ما بعد التخرج الا البطالة وما بعد البطالة الا شغل جديد

بصحى من النوم وانا حامل شهادتي بلف فيها الشركات والمكاتب , ومفكر حالي اشي كتير كبير , أنو هييييييه انا خريج حقوق من احسن جامعة , بس بتفاجئ لما الكل يقلي الله يعوض عليك عمو , ما بدنا ناس معهم بكالوريس حقوق .
بالاخير بعد ما خلصو الشركات بالبلد , صرت ألفلف على محلات أواعي , كنادر , اكسسوارات ... ما حدا رضي يشغلني , وكل ما اجي اقنعهم بحالي اني لقطة , بكتشف انو مابدهم اشي بالـ CV الا انو يكون الشب طنط و مرخي .. يعني راحت علي .

واخيرااااااااا , اكتشفت اني عالة على المجتمع والي متلي لازم استئصاله , فكرت اعمل زي الاجانب اوقف على اعلى برج ويجيني المحافظ يقنعني اني ما انتحر , و اقلو يا اما بتلاقولي شغل او برمي حالي من فوق عمارة البرج , بس بعد تفكير دقيق تزكرت انو احنا شعب بنحب نهوي لبعض , يعني لو اوقف على عمارة البرج واقلهم بدي ارمي حالي , بصير الشباب يغنولي ويعبو براسي اني انط , وانا بصراحة عقلي صغير وبتهوالي بسرعه , يعني كمان ما الي مصلحة بهالحركة , مشان هيك شلت الفكرة من راسي .

وكأي عاطل عن العمل صرت اقعد ساعات وساعات على النت وبطق حنك وبعبي الفراغ الي بحياتي , لأني دايما فاضي , (فاضي اندراوس ها ها ها ) , وبتلاقووني قدام البنات الي بحكي معهم على النت بقلهم اني تخرجت من احسن واقوى جامعة , وتخصص حقوق كمان , وهلأ انا محامي متدرب ببنك باخد 500 دينار , طبعا مش طموحي هالراتب بس يالله مع الوقت بتحسن , وانو كل اواعيي بدلات كلها من ماركات ايطالية . و كنادري من احسن الماركات البريطانية للجلد و معي سيارة X6 , والمسخمات ما بعرفو انو كل اواعيي من احمد المصري وضراغمة , وكنادري من هدول تبعون اميـGــو الي لما امشي بصير يزمر ويطلع ضو من ورا , و الباصات انا وياهم زي السنيورة , عشرت عمر .

لحتى فجأة بيوم من الايام بتدخل علي صاحبتي من الجامعة اسمها ( هلا ) , صرنا نحكي وندردش كيف كنا نقعد ونتهبل بالجامعة , وبعد شي ساعتين تزكرت تسألني كيفك وشو بتعمل بحياتك هلأ , قلتلها اني لسه ما لقيت شغل وبدور على اي اشي اشتغل فيه , وقالتلي انها بتشتغل بشركة لـ website أسمو طلاسم , بقلها شو اسمو؟ , بتقلي طلاسم ! ,, قلتلها طيب الشغل مش عيب ,بس شو بتشتغل فيه؟ حجاب؟
(انا كل فكري انو موقع طلاسم من اسمو , بعمل طلاسم وشغوذات وحجب للتفريق بين الازواج ... )

اعطتني الlink ودخلت على الموقع وعجبني , بقلها بدكم موظفين ؟ , لما قالتلي اه وتعال عالmeeting على طول , حسيت انو ابواب السما انفتحتلي خصوصا اني مدمن انترنت وبحب كل اشي بتعلق فيه .
رحت على الـmeeting وقابلت الشباب بالشركة وعجبني الشغل كتير , وقررنا انا اهتم بالمقالات و نفتح منتدى (forum) انا الي امسكو كمان , جد انبسطت من كل قلبي خصوصا برضو من هواياتي كتابة المقالات الساخرة .

رح اصير انشالله كل اسبوع انزل مقالة او sketch صغير وبدي اثبت حالي اني قدها وقدود , وممكن بالمستقبل الكتير بعيد اصير محامي للشركة الي بشتغل فيها ..

بعد الـmeeting رحت عزمت هلا على شاورما حلوان الشغل الجديد , وخليتهم يزيدولها على السندويشة مايونيز لأنها بتستاهل كل خير ..
وانا مروح حملت شهادتي ورحت فيها على بياع الترمس , اعطيتو الشهادة يلف فيها دراي للزباين , واخدت مقابلها كيس ترمس صغير ببلاش.
وهاد كيس الترمس الصغير , كان الاشي الوحيد الي استفدت منو بشهادتي ..