اكتر 6 شغلات بكرههم بعيد الفطر

لما افوت على اكتر من محل , واشتري من كل محل قطعة على اساس انه السعر هون ارخص من المحل الي جنبو , وبفوت على المحل التاني بشتري قطعة تانية , والتالت والرابع ..

وفعلا بشتري احلى بلوزة واحلى بنطلون واحلى شوز واحلى جاكيت .. من اربع محلات مختلفة

و بحمل الكياس وباجي البيت مبسوط فيهم وبخبيهم مشان البسهم اول يوم العيد ...

وبس البسهم بكتشف اني جايب بلوزة حمرا على بنطلون اخضر وجاكيت ابيض وبوط اصفر ..

يعني مافي اشي لابق عالتاني

مشان هيك كالعادة بضطر افتح خزانة اخوي والبس ما تيّسر من اواعيه القديمة ..

#5 :

لما اصحى من النوم اطلع على صلاة العيد , بكون انا حدق وشاطر وفاهمها عالطاير , فبروح مع ابوي بأواعي النوم , مشان لما ندبح خاروف العيد ما يتوسخو اواعيي .. بدخل الجامع بفكر انو الكل مش حدق زيي لأنهم لابسيين أحلى الاواعي عندهم .. واحنا مروحين عالطريق بقعد اتطلع عالعالم ليش مشخصين وكاشخين بأحلى لبس؟؟ مش خايفين يجي عليهم دم لما يضحو بخاروف ؟ ... بالاخير بسأل ابوي .. بقلي انو التضحية بالخرفان بتكون بعيد الاضحى مش الفطر ..

#4 :

عجقة العيد .. مش اي عجقة زي ما بتكون باليوم العادي .. العجقة هي لما يجي واحد عندكم عالبيت وانت مش عارفة ويقعد يبوس فيك ويعبي وجهك بزاقة (بعيد عن السامعين) .. وانت لسه مش عارفه .. ويصير يلخبط بأسمك ويعك فيه ويقعد يقلك والله كبران بتزكرك وانت صغير يا يزيد لما كنت احملك على ايدي ( انا محمد واخوي الكبير يزيد ) .. و ياكل معمول وتضل تصبله قهوة .. وانت كمان مش عارف مين هاد ..

بس يطلع بسأل أمي مين الاخ؟ .. بتلقلي مابعرفو

بسأل ابوي مين هاد؟ .. بحكيلي هاد بكون ابن خال عمة حماة زوج بنت جارتنا اول ما انولدت بالـ86 ..

يعني لو فتحنا شجرة العيلة ممكن باراك اوباما .. او أرفس برجلي (الفس برسلي) , بقربلي اكتر منو

#3 :

برامج التلفزيون بالعيد , وما ادارك ما برامج التلفزيون ..

كل القنوات الي مابتحطلك مسرحية الواد سيد الشغال , بحطو بدالها مدرسة المشاغبين

واليوم التاني مشان التغيير , بحطو مسرحية العياال كبرت ..

واذا متلا كنت رياضي .. فرصة ما تفتح على قنوات الرياضة , لأنو اذا ما لقيت لقطات من اولمبياد اثينا .. بتلاقي من اولومبياد سدني ..

يعني اللقطات الي بتنعرض صارلها من 4-8 سنين هي هي كل عيد

واذا سكرت الفضائيات بوجهك وفتحت عالانتين الداخلي على قناة ارضية بتلاقي مستر بين .. نفس الحلقة تبعت لما ينشف الخس بجراباته ويصير يلحق الدبانه بالسكينة ..

مشان هيك افتح الشباك وضلك اتفرج على الرايح والجاي احسنلك من مليون تلفزيون

#2 :

بما انو هاد العيد الاول الي وانا بشتغل وباخد راتب .. فكان هاد عيد غير شكل تماما .. يعني زيو زي اي عيد بيجو الكل بعايدو علينا , خوالي عمامي خالاتي عماتي والجميع .. بجيبو معهم ولاد صغار ..

طبعا ما عمرهم سلمو علي الصغار , بس اول يوم بيجو بنطو علي وكلهم بنادوني ( عمو محمد) مع العلم اني في منهم مش كتير صغار يعني مافي بينا 5 سنين بس ..

و الي ما بنط علي وبحكيلي عمو محمد , امه بصوت واطي بتقله ( ولك روح قله كل عام وانت بخير عمو محمد بركن عيّدك يا ملعون ) ..

وفعلا والله اكتر من نص الراتب راح باليومين الي مضو ..

#1 :

اما عن المسجات .. فما بدي اطول عليكم بالحكي , بس جد نص المسجات الي وصلوني كانو من ارقام غريبة لناس ماسح رقمهم من اربع خمس سنين .. تخيلو في واحد بعتلي كل عام وانت بخير وبالاخير كاتب انو اسمو ابو جمال .. طيب انا وجهي وجه واحد بعرف ابو جمال؟

المهم مش رح اطول عليكم بترككم مع شيطان الشعر الي اجاني لوصف شعوري اتجاه مسجات العيد :

المسجات , وما ادرك ما المسجات ..

تصلك من كل مكان .. وحجمها كأنها نهر الفرات

باعثها لا تدري من هو .. عبدالله؟ معاذ ؟ عدنان ؟ ماهذه المتاهات

لا يهم الاسم فهو .. شخص مسحت رقمه في الزمنات

يتذكر الجميع بس بالعيد ... وببعث المسج كوميات كوميات

لو احصينا مجموع ما بعث .. لكان المجموع مش قرش ولا ثنين .. بل ليرات

فيا ماراً على مسجي سلاما .. خبر من بعث هذه التفاهات

اني لا ادري ما هو ..ايش اعمل؟ احلفلو على جبل عرفات؟

والله نص الي ببعثولي مسجات .. مسحت ارقامهم واصبحو من المهملات

وحتى أصدق في يميني .. هناك بعض الاستثناءات

فأنا امسح كثيرٌ من ارقام الشباب .. ولا امسح ارقام البنات

لا تقولي عني اني رخيص .. بس البنات البنات الطف الكائنات

ألا ليت شعري هل يبيتن ليلتن .. لأقف على اطلالك ليالٍ وليلات